—160→
Escritura del 21 Marzo de 1336. Hállase entre las originales del siglo XIV en el archivo del monasterio de Santo Domingo el Real.
Sepan quantos esta carta vieron commo yo yuçaf fi de don salamón abén çahal otorgo que vendo á vos ys.e71 garcia fiio de ys.e domingo de canilas72 é á vuestra muger iohana garcia una viña que yo he en el yuncar del ensiniella, de que son alledanos fiios de Martín ferrandes, et de la otra parte Martín Sanches de baraxa73; toda éntregamiente con entradas é con salidas é con todos sus derechos, segund quel pertenesçen, por veinte maravedís de la moneda, que agora anda, que fasen dies dineros el maravedí. De los quales maravedís me otorgo por pagado, é los passó á mi poder ante los testigos é el escrivano sin todo entredicho. Et yo, este dicho vendedor, so fiador é sanador de todo omne ó muger que vos la demandare ó contralare, que yo que vos la faga sana en manera que sanamiente finque en vos los dichos conpradores, ó en quien de vos la oviere, para sienpre jamás. Et por lo conplir obligo todos mis bienes avidos é por aver.
Fecha en Madrit, veynte é un dia de março, era de mill é tresientos é setenta é quatro años.
Testigos rogados, que estavan presentes: de Judíos, don çag çaragoçí; é de christianos, Gonçalo gil é estevan ferrandes escrivanos.
Et yo pero bernalt, escrivano
público en Madrit por nuestro señor el Rey, la fis escrevir;
é en testimonio de verdat fis este mio sig
no.
FIDEL FITA.